Bei strahlendem Sonnenschein am Freitagabend, 22.07.2022, hat der Memminger Stadtbüttel den Memminger Fischertag 2022 eingeläutet. Gemeinsam mit seiner Stadtgarde präsentierte er sich am Markt- und am Schrannenplatz.
Die Stadtfischer haben am Fischerbrunnen am Schrannenplatz die Fischerstatue angekleidet, damit er am Samstag ordentlich gerichtet für den Fischertag ist.
[URISP id=517722]
Die Red‘ vom Büttel:
Liabe Leit, liabe Gäschd, aus Karatas mit BM Necip Topuz ; aus Auch mit BM Christian Laprebende, aus Litzelsdorf mit BM Jürgen Lesch ond alle aus Bada Württemberg horchat zua!
Bürgermoischter ond Raut der freia Reichsstadt Memmingen hot noch zwoi Joahr bschlossa, dass morga am 23. Juli 2022 der Memminger Fischertag meh stattfenda darf!
Dia Soiche, die schuldig war –„Des Corona“
Isch zruck ganga ond dia Kranked isch au nomma ganz so gfährlich!
Der Fischerzug, goht also morga meh om viertel noch Siemne vom alta Impfzentrum zum Schrannaplatz! – ond au der Oberfischer schwätzt sein Fischerspruch au meh om dia Zeit!
Es ischd grundsätzlich verbota vorm Fischerspruch mit seim Bära an da Stadtbach nahz´hockad!
(au jetzt hau i des Gegendere ganz vergessa!)
Wenn um 8te da Böller kracht derfet dia Fischer Schrägstrich In in da Stadtbach neijucka!
Ma hot da Forella- und Forellinnenpreis fiar da Samstig so lossa wia in de letzde Joahr au!
Der wo abr meh verlangt, wird am Marktplatz von den Memminger Scharfrichtendendenden
aufghängt!
Memminga, 22. Juli zwoiazwanzg
Dr Oberbürgermoischder
Außerdem soll i vom OB Schilder noch folgende 10 Gebote ausrichta:
I.
Es isch grundsätzlich immer noh strengschdens verbota, dass ma Sonnenblumenöl hamschderat! Em April warat alle Regal in de Kaufhäuser ratzaputz leer! Ond im Juni au noh! Des goht id!
Des gleiche gilt fiars Clopapier!
(Do hau i mi immer gfrogat, was dia leit mit Clopapier ond Sonnablomaöl dont! A Freind hot dann die Lösung gwisd:
Es Clopapier wird damit frittiert, dass es noh länger hält! Es schmeckt dann au a bissle besser; wenn ma gar nix meh zom Fressa hot!)
Oh mei, d’Leit sind mit dem Corona scho komisch wora!
II.
Dia Maskenpflicht isch au in Memminga im Moment ganz abgschafft!
Bei manche Bürger wärs aber guat, wenn ma se´s lebenslang dobalossa dät! Für Folgende Persona werd des laut OB Schilder hiermit amtlich angeordnet – Dia Aufzählung dauret jetzt a guate halbe Stund:
Herrn- und Frau —– (Halt: Einwand Hauptmann Datenschutz!)
Also… Mach mer weiter!
III.
Wer a Geld übrig hott ka jetzt fiard Freiheit spenda! Es isch a Stiftung gegründet wora für d Kramerzunft! Alle sottet mitmacha! Stadt reachnet, dass im a halba Joahr guat dreisg Milliona zammakommat!
Anmerkung von mir: Wenn des funktioniert, hot der Schilder gsait, dann geits Stiftungen für:
Straße nach Hurren, a Nuies Klinikum, a Nuies Freibad, en Nuier Weinmarkt, a Nuie Edith-Stoi-Schual, an Nuie ECDC-Anbau (wobei dia des scho verdient hättet, weil dia so sauguat spielat!)
An Nuie Sportplatz Beleuchtung in Stoihoi, a Nuie Sporthalle in Aumadenga! Ond an komplett nuia Öpnv! Und zwar Koschtenlos!
Dr Kämmerer fend dia Idee mit de viele Stiftungen sauguat! Do könnt Stadt jede Menge Geld spara!
IV.
Ab Morga ziaht der Robert Wallastoi, Eusebius Junger ind Stadt nei! Wer den id aständig griaßt, bekommt Ärger mit m OB selber! Beschwerden dies bezüglich bitte auf sei private Händienummer 0196/5353535!
V.
Affenpocken send sehr gefährlich! Des woiß dr OB vom Gsundheitsminischder Holycheck! Ma muass saumäßig aufbassa, wenn ma in dr Fußgänerzone a ma Aff begegnet! Des kommt laut Minister Holycheck sehr häufig vor! Eiser OB hot deshalb von den 240.000 Impfdosen, dia dr Lauterbach bestellt hot, gleich amol 40 Stuck noch Memminga schicka lau! I hau noh gfrogat, warum blos 40!? No sait dr Schilder, dass des fiar da Affazirkus im Stadtrat scho roicht!
VII.
Es geit im Impfzentrum ab August zwei Impfunga! Wenn man alz mitanand nemmt, dann griagt ma als Buuschderprämie a Kilo Banana drzua!
So jetzt noh dia Punkte: 7 – 10.
Es folgen nun noch 3 Wahlversprechen:
– Solang dr Schilder dr OB isch wird’s emmer d Fischertags-Friahschoppen in der Stadionhalle geaba! Niemals in der Stadthalle! Versprocha!
-Wer OB Schilder im nägschda März wählt, darf bis zum Neubau vom Freibad emmer in sein privada Pool zum Bada komma! Zugang in Hart von dr Buxach her. Es isch koi Zaun do! Oifach nei jucka! Täglich von 9.00 bis 22.00 Uhr! Wer an Duschd hot, ka bei dr Karin leita! Oinziger Noachteil: Dia Regelung gilt vom 01. November 22 bis zum 05. März 23!
– Wenn em Winter bei de Stadtwerke des Gas ausgoht, dann derfet alle meine Wähler zum Aufwärma au noch Hart Hoim komma! Diese Regelung gilt immer – au über meine endgültige Pensionierung 2029 hinaus!
– Und zum Schluss noh a selber gedichtetes Wahl-Gedichtle vom OB. Do hott er mehrere Wocha dra gschaffat! Kommt dann au auf alle Wahltafla!
„Liabr Bürger – sei id bled!
Wähle richtig – wähl´ Manfred!“
(So, jetzt alle mitanand:)
So, des wars fiar huir! Kennat Eich ohnehin id so viel auf oimal merka! Des andere ausm Stadtrat ond so verzäll ichdann negschtes Joahr meh !
Vor allem des vo de Stadträt – Ja, eisr Rupprecht isch ja au oiner! Wobei der sich als Finanzreferent ganz guat astellt. Böse Zunga behauptet zwar, seit der des Amt inne hott, hott Stadt koi Geld meh! I glaub abr eher, der hot alles Geld zur nuia fusionierta Sparkass traga ond guat aglegt!
Mei Rupprecht – brausch di jetzt id ärgra! War bloß a Witz vom Büttel!
I woiß scho, dia moischte Stadträt v erstandat meine Späß´id – aber Du scho, oder??
Also bleibat gsond ihr Alle und Allinnen!
Memmingen, 23. Juli 2022,
Unterschrift:
Der selbige wia vor zwoi Joahr
Du Hauptmann! Warum send ihr jetzt vorher id reachtzeitig do gweah??
